Интервентна „единица“ од кофи што ја собираат протечената дождовница, тавани оштетени од влага, раширена мувла на ѕидовите, а на нив потпрени најчестите „експонати“: џогери за собирање на водата од подот... Речиси нема граѓанин што не знае дека ваква е сликата од внатрешноста на Државниот архив на Македонија. А тоа е институција од посебен интерес за државата, надлежна за чување на целокупната документација од трајна вредност и историско значење што се создава на територијата на земјата.